1.انا مش حاسة ان عندي 30 سنة
2.لازم اخللي بالي ان زي ما في 30 سنة عدت هوا ممكن برده 30 سنة تانيين يعدوا هوا او اكتر او اقل مش مهم ..المهم ان السنين بتجري هوا
3.انا بحبني..ومهما وقعت او غلطت هفضل احبني و مش هاجي عليا ابدا
4. عندي حاجات كتير لسه عاوزة اعملها ..مش عاوزة الوقت يعدي من غير ما احققها
5. انا مش حاسة ان عندي 30 سنة
6.انا مش ندمانة على اي حاجة عملتها في حياتي وراضية تماما عن قراراتي واختياراتي
7. ربنا كريم اوي و حنين اوي و مهما بعدت هو القريب..انا بحبك اوي يارب
8. جوايا لسه طفل ..طفل بيعيط ويصرخ ويضحك من قلبه بصوت عالي ..ومش عاوزاه يكبر ابدا
9. عاوزة كمان 30 سنة لو ربنا اداني العمر اقعد برده واكتب هنا قواعد عيد ميلادي الستون :)
10.انا برده مش حاسة ان عندي ثلاثين سنة
11. زمان لما رقم 30 سنة ده يتقال قدامي ببقا شايفة ان صاحبته دي بالنسبة لي طنط ..دلوقتي لو حد قالي طنط ممكن اديله على بوزه..احب اوجه اعتذاري لكل الطانطات اللي قابلتهم في حياتي
12.بالمقاييس العادية انا المفروض عاقلة وراسية وناضجة وحاجات كده معرفهاش بصراحة :)
13.بحمد ربنا على كل رزق رزقني بيه انا عارفاه وواعية له او مش عارفاه وهفضل احمد ربنا طول عمري
14.انا مش من الناس اللي بتتكسف تقول عمرها
15. ومن الناس برده اللي مبقتنعش بكلمة مش هنفرح بيكي بقا و مش بعيد لو قلت سني قدام حد يقلبها صعبانيات وجوانيات مع مصمصة شفايف ..حضرتك انا فرحانة بنفسي ومش محتاجة فرحتك انت بيا ويالا اتكل على الله من هنا
16.وعادي جدا تلاقيني بحب اركب مرجيحة و اجري تحت المطر و اكل شوكولاتة وايس كريم واناكف طفل صغير واعمل عقلي بعقله ..عااادي جدااا
17.انا برده مش حاسة ان عندي 30 سنة
18.انا مش من الناس اللي بتخطط لحاجة و بحب اسيبها لربنا وتيجي زي ما تيجي ..ومعتقدش هتغير
19.بصراحة معرفش هو سن الثلاثين ده ليه احساس معين يعني وتصرفات معينة ولا عادي وكده لما اصحى بكره هشوف :)
20.انا دماغ ومش متضايقة اني دماغ ومعنديش مشكلة اني افضل دماغ ..وهذا لا يخللي حد يتدخل في دماغي ..كل واحد يخليه ف دماغه
21. بقالي كتير مكتبتش وده يخليني اقول ان سن 30 مميز عشان خلاني ارجع اكتب تاني
22.مش عارفة هو المفروض لما اصحى الصبح هحس بايه..بس اكيد هبقى فرحانة ومبسوطة ومستنية التورتة والهدايا و الشمع ويالا حالا بالا حيوا ابو الفصاد..
23. شكلنا دخلنا في الجد ولا ايه ..
24.مش زعلانة من حد ومش عاوزة حد يكون زعلان مني
25. ستر ربنا هو اللي مخللي اي حد فينا عايش و رصيد الستر لازم يكون مشحون..يارب منساش اشحنه ابدا
26.بحب المفجآت جداا..ومهما مر الوقت هفضل اضحك زي الطفل الصغير لو اتفاجئت مفاجأة حلوة
27. انا مش بوشين وعمري ما هكون بوشين وساعات بكون مدب ولكن هذا لا يمنع اني طيبة..اذا لقيتني مدب في لحظة تغاضى وكمل الحوار عادي جدا ولا اكن في حاجة حصلت هذا غير مقصود بالمرة ..فقط في حالة العشم بينا.. والا اعرف اني قاصداها يا برنس :)
28.ربنا يديم نعمته عليا ويرضى عني
29.مش لاقية حاجة تاني اكتبها
30.انا مش حاسة ان عندي 30 سنة
هناك تعليق واحد:
لما الرسول يقول : أعمار أمتي بين الستين ، فضروري لما نكمل التلاتين نحس بأحاسيس مختلفة ونعمل وقفة مع نفسنا لاننا بكده وصلنا لنص المسافة تقريباً ، كل سنة وإنتي طيبة وعقبال مية سنة :)
إرسال تعليق