كنت قاعدة ف ساعة صفا كده بيني و بين نفسي ... جت الهانم و قالتلي انا ليا عندك عتاب صغير ...قلتلها ليه يا امورة
فدار بينا الحوار التالي:
نفسي:انتي على فكرة ظالماني و قاهراني
انا:اخص عليكي وانا اقدر اعمل كده ف نفسي برده؟
نفسي:عملتي واللي كان كان
انا:ايه اللي حصل بس
نفسي: انا قاعدة صابرة عليكي من بدري و انتي ولا انتي هنا عايشة حياتك ولا حاسة بيا
انا: ليه قوليلي يا حياتي ايه اللي حصل؟
نفسي: اقوللك ايه ولا ايه ... تحبي اقوللك انك بتيجي عليا اوقات كتير اوي و تكتميني...تحبي اقوللك ان اوقات كتير اوي بيبقى نفسي اعيط و انتي بتقوليلي لا و تمسكي الدمعة انها تنزل ولو نزلت و ده نادر بتمسحيها بسرعة عشان محدش يشوفها
انا: ما هو انا مش بحب اعيط قدام حد و ساعات بحس ان العياط ده ضعف
نفسي: طيب ما تضعفي فيها ايه يعني مش عيب انك تسيبي لنفسك فرصة انها تخرج اللي جواها
انا: (صمت)
نفسي: ده غير انك كمان اوقات كتير اوي بتجبريني اني اضحك و اعللي صوتي و اهزر مع الناس و انا مش عاوزة
انا: ما هو انا بحب اضحك و اهزر و كده وحتى لو تعبانة ضحكي و هزاري ده اللي بيخرجني من اللي انا فيه
نفسي: لا يا ماما انتي بتمثلي علي الناس مش بتبقى عاوزة تضحكي انتي بتحاولي ترسمي الضحكة و ترقصي و تغني و انتي من جواكي مش عاوزة
انا: طيب ايه اللي يريحيك؟
نفسي: انك تسيبيني شوية اشم نفسي مش كل حاجة لا و بس و بلاش عاوزة اعيط وقت ما انا عاوزة و اضحك وقت ما انا عاوزة نفسي اقول لا براحتى و اه براحتي مش عاوزاكي تيجي عليا لو سمحتي ممكن؟
انا : هحاول
خلص الحوار بيني و بين نفسي و انا مش عارفة اذا كنت وانا بقوللها هحاول كنت فعلا هحاول ولا بسكتها وخلاص عشان تبطل زن على وداني
هناك تعليق واحد:
جميله فعلا
للاسف مابعرفش اقول كلمات مدح وكدا
بس الاجمل انها فعلا مع نفسك ولان فى اغلب الاحيان لما بنكلم نفسنا بنكون صادقين
حتى لو بنقول شى مختلف عشان نتظاهر بيه ادام الناس
تحياتى وربنا يوفقك
إرسال تعليق