خبيني في جناحاتك ...

وحشتيني اوي اوي على فكرة
النهاردة ذكرى وفاتك حبيبتي
لسه فاكرة كل احداثه زي ما يكون امبارح مع ان مر عليه لحد دلوقتي 8 سنين
يااااااااااااه تخيلي بقالنا 8 سنين مشفناش بعض
8 سنين متكلمناش مع بعض  ولا ضحكنا و لا هزرنا و لا غنينا سوا
8 سنين مطبطبتيش عليا و لا اخدتيني في حضنك ولا دعيتيلي
تخيلي اما ده يبقا احساسي انا و انا يادوب حفيدتك
تخيلي بقا احساس امي ايه
انا مفكرتهاش ان النهاردة يوم ذكراك علشان انا عارفة انها مش ناسية
كل يوم بيعدي عليها من ساعة ما روحتي صعب اوي
بتفتكرك في كل ساعة و كل دقيقة
تعرفي انها كل عيد ام بتعيط اوي رغم ان احنا بنبقى حواليها و نحاول نخفف عنها
على فكرة انتي وحشتينا اوي اوي اوي والله
فاكرة لمتنا سوا في بيتك وصوت ضحكنا كان بيجيب اخر الدنيا فبتقوليلنا وطوا صوتكوا شوية و تقري المعوذتين علشان خايفة الناس يحسدونا
اقولك حاجة ...هما فعلا حسدونا
من ساعة ما مشيتي و ضحكتنا مش زي الاول و لمتنا مش زي الاول و وجودنا مع بعض مش ليه نفس الطعم
جدتي الحبيبة ... لا تيته ديدي زي ما كنت بقولك
انا اتغيرت اوي يا تيته من ساعة ما رحتي معرفش للاحسن ولا للاسوأ بس اتغيرت و كبرت
تخيلي ان انا كبرت و انا طول وجودي وسطكوا كنت دايما بحس اني طفلة و دلوعة و بس
دلوقتي مبقاش جويا نفس روح الطفلة الدلوعة دي تفتكري ليه ؟ مش عارفة الصراحة
صحيح انتي ليه مش بقيتي تجيلي في الحلم زي الاول؟
اوعي تكوني زعلانة مني
انا عارفة اني مقصرة في دعايا ليكي و قراية الفاتحة ليكي انتي و جدو بس صدقيني مش بايدي
الفترة اللي فاتت دي بجد كانت من اصعب فترات حياتي عليا
مريت بظروف صعبة اوي و كنت حاسة ان الدنيا بتهاجمني بشراسة اوي مش عارفة ليه
بس انا مش زعلانة منها انا بس كنت متفاجئة و بعدين اخدت على كده ماهو مش طبيعي ان الدنيا تبقى وردي على طول
ساعات كده و ساعات كده
كبرت و عقلت و نضجت وبقيت اجمد من الاول
هستخدم تعبير مديري ليا اما قالي في مرة "انا عارف انك دلوقتي لو ضربتك في الحيطة هتتردي ليا تاني من غير ما يجرالك حاجة"
تعرفي ان ده احساسي دلوقتي لو حد ضربني في الحيطة هرد له تاني زي الكرة المطاط عارفاها ؟
ايوة انا حاسة بيكي دلوقتي بتبتسمي و تهزي لي دماغك
يااااااااااااه تعرفي ان انا نفسي ارمي نفسي في حضنك دلوقتي و تطبطبي عليا و تدعيلي زي ما كنتي بتقوليلي دايما
"ربنا يريح قلبك ويهدي سرك و ينولك اللي في بالك"
مش عارفة ليه دايما بتخيل ايديكي دي جناحات كبيرة بستخبي فيها
خبيني شوية جوا جناحاتك يا تيته
نفسي في طعم راحة البال اللي كنت بشوفها معاكي
معرفش راحة البال دي راحت علشان انتي رحتي ولا علشان الوقت اتغير و الدنيا مش ماشية زي الاول
تفتكري لو انتي موجودة دلوقتي كنا كلنا هنتعامل مع مشاكلنا زي دلوقتي
لا لا اكيد كنتي هتخبينا في جناحاتك و صوتك الحنين يهمس في ودانا بدعواتك المحببة
حاسة بيكي حزينة عليا
اوعي تحزني يا حبيبتي من كلامي معاكي او تقلقي عليا
انا تمام والله و الحمد لله
راضية و بتعلم و بشوف و بجرب و ربنا موجود معايا و حاسة بيه جنبي
انا بس الصراحة مقصرة في علاقتي بيه
ادعيلي احسن علاقتي بربنا يا تيته علشان انا مضايقة من نفسي اني بدعيله و انا مقصرة في حقه و هو سبحانه برحمته قريب مجيب
انا طولت عليكي في الكلام؟
معلش اصلك واحشاني اوي الصراحة و مفتقدة كلامي معاكي و حكاوينا و غناوينا
حبيبتي خدي مني البوسة دي على خدك الناعم
و البوسة دي على جبينك المرسوم عليه زبيبة الصلاة
و البوسة دي على ايدك اللي طبطبت و شالت و حضنت
ايديكي اللي عاملة زي الجناحات
ممكن استخبى فيهم شوية