مامي ..آر يو اوكي ؟

كنت قاعدة انا و صحباتي النهاردة بنتكلم و بعدين افتكرنا ذكرياتنا من واحنا اطفال جيل التمانينات ده.. الجيل الذهبي االي ضاع ف النص لا طال الزمن الجميل ولا الزمن الحديث :))))
لقيتنا بنفتكر اللي كنا بنعمله و احنا صغيرين و نضحك اوي لقيت عندنا ذكريات مهما كانت بسيطة بس حلوة شايلينها معانا لحد دلوقتي و هنشيلها كمان لحد ما نكبر اكتر و نقولها لولادنا بس ربنا يستر و ميضحكوش علينا
لقيتني بفتكر معاهم مصروفي اللي كان ربع جنيه و كيس الشيبسي بالملح الاحمر ده اللي كنت بشتريه و بجيبهو اكله واحس ياااااه ده انا كلت شيبسي
و افتكرت جرس الفسحة اما بيضرب و نجري على حوش المدرسة و نقول هيييييييييييييييييييه فسحة فسحة عم خليل الازعة و كبرت و معرفتش برده مين عم خليل الغلبان الازعة ده و هل هو عم خليل اللي كان بيسقي الورد ولا حد تاني
افتكرت الكانتين اللي كنا بنجري عليه عشان نشتري كيس بوزو ولا جيلي كولا و قعدت اعصر مخي ياترى العم اللي كان بيبقى واقف في الكانتين اسمه ايه و اخيرا عرفت اسمه عم شعبان جوز داده ام نهى بس الله اعلم قبل ما تخلف نهى كان اسمها ايه :))))
ياسلام بقا على لمتنا ايام رمضان و انا مستنية النينجا ترترلز وكمان باور رينجرز و كانت تيته الله يرحمها تحب تشغل الراديو على البرنامج العام وقت الفطار و اقعد انا ازن عشان يشغلوا الكارتون فتجيبه عشان خاطر عيوني ..الله يرحمك يا تيته
اغانينا و احنا اطفال و لبلبة و هي بتغني و صفاء ابو السعود و اصحابي و صحباتي هنا و محلك سرررررررررررر و فوازير عمو فؤاد و جدو عبده عامل ايه زارع ارضه زارع ايه جدوووووووو و انا انا انا ابريق الشاي
و قبلها  عفاف راضي و هي بتغني سوسة سوسة كف عروسة و اللي يسقف يستاهل مني بوسة و كانت ماما تشغلي الشرايط دي كلها وانا بعد كده بلا فخر سجلت عليها اغاني باك ستريت بويز ايام المراهقة الفاشلة :)))
البومات الشمعدان و الجادون اللي بنجمعه و طلع عينينا عليه ان احنا نلاقيه ابداااااااااااا
واعلانات خالتي و طنطي و مامتي حريفة لبان و قلتلهم على هارتي قالولي يا سلام و اهلا اهلا كاراتيه طعمك حلو كده ليه... و ايه تاني ايه تاني اه كوفرتينا على العريس موافقين يبقى هيتجوز و يهيص امواااااااااااااااااااه
المسطرة اللي كانت بتتلف على الايد دي اختراع الصراحة واللبان السحري انضغه القاه الوان الوان يا نهار ابيض
ماما نجوى و بقلظ و عروستي و سينما الاطفال سينما فيها حقيقة و فيها الخياااال
و اما كبرنا شوية واليوم المفتوح و برنامج اماني و اغاني ياسلااام و انا لسه راجعه من المدرسة و اتفرج عليه لحد ما اتغدى و ادخل اذاكر مكانش عندنا نوم الضهر و لا فيس بوك ابسلوتلي 
وبالليل السهرة تحلى مع مسلسل القناة الاولى و مجلس الشعب ثم مسلسل القناة التانية و يااااه اول ما زينا و هركليز ابتدوا يجوا ده كان الانحراف كله
و مرحلة المراهقة بقا و الاغاني الانجليش و باك ستريت بويز و بويزون و ماجدة الرومي و اول مرة اسمعها في رائعة كلمات و كاظم الساهر بقا و انا و ليلى و افتكر تعليق اختى وهي بتقولي من كام يوم انها كانت طفلة عندها 6 سنين تسمع كاظم و باك ستريت بويز ليييييه
كنت اخت كبيرة مستبدة الصراحة :)
و البوسترات اللي اضيع مصروفي عليها كان واحد قدام المدرسة يقف يبيعها و يجيبلنا كل جديد مخصوص و اوضتي لم تسلم من غزوي البوستري المستبد 
كانت ايام والله :))))
قعدنا نفتكر كل ده و نضحك اوي و اكتشفنا ان عندنا ذكريات حلوة اوي نرجعلها و نضحك عليها و اكتشفنا برده ان ذكرياتنا واحدة تقريبا كأن كل البيوت متشابهة و كان في بساطة و روح حلوة غير دلوقتي خالص..انا مالي كده بتكلم اكن ده كان زمان اوي عادي يعني دول هم كام سنة مش اكتر
و قعدت برده افكر هم ولادي هيبقى عندهم ذكريات ايه يحكوها لصحابهم؟ ايه اغاني الاطفال بتاعتهم ولا الاعلانات الحلوة اللي هيفتكروها ولا ايه ولا ايه ولا ايه؟
الله اعلم هيبقى الزمن قدام عامل ازاي و لا لو جيت و حكيت لولادي احنا اصلنا كنا بنجمع العجلة و ندور على الجادون هيبصولي بريبة ويقولولي 
مامي ار يو اوكي ؟