مبسوطة بس مش هكررها

امبارح و بما اني زملكاوية جدا و  بما ان نهائي الكأس كان امبارح  اتعرض عليا اروح الماتش فما اترددتش لحظة واحدة
رغم ان الموضوع كان فيه نسبة خطر كبيرة جدا بسبب الاضطراب اللي البلد فيه و بسبب ان اي نهائي بطولة اكيد هتكون فيه الاعصاب مشدودة جدا ووارد يحصل تهور من اي من الجانبين
بس دي فرصة لا تعوض خاااااااااااالص
انا بحب الزمالك و بحب جو الاستاد و الحماسة و التشجيع طبعا رحت و انا ايدي على قلبي وحاسة اني هخرج مضروبة :)

ملاحظاتي عن حدث امبارح

1. الجمهور قبل بداية الماتش و مع دخول اللاعبين كان شكله تحفة و التشجيع كان بيهز الاستاد و الحماسة اللي في قلوب الناس و الفرحة اللي كانت مرسومة على وجوههم نسيتني ان فيه اضطراب في البلد او ان في ازمة او شبح فتنة كان فيه الالاف بيهتفوا مع بعض في نفس واحد و يغنوا مع الاغاني الوطنية اللي اتذاعت لا حد بيسأل حد انت ديانتك ايه و لا حد اصلا مركز غير في انه عاوز يكسب و يشجع و يفرح بصراحة كان منظر مفرح جدا
2. رغم اننا كنا حاجزين درجة اولى الا ان في دخولنا الاستاد محدش بص في تذكرتنا اصلا و قعدنا في اي مكان و خلاص و كان حوالينا ناس بعضهم شكله غريب جدا ميديش حتى على درجة خمستاشر لو كان فيه درجة اسمها كده
3. بعض المشجعين حاولوا يستفزوا عساكر الامن المركزي و هم لا حول لهم ولا قوة و كانوا بيحاولوا ميردوش عليهم و المشجعين بيتطاولوا عليهم لدرجة ان في واحد ضرب عسكري بالقلم على وشه و العسكري ما اتهورش وفضل ساكت  بجد حاجة تحزن و تحبط ليه قلة الادب دي و ليه نستقوى على الناس انا بصراحة اتصدمت من المنظر
4. كان في بعض الاهلاوية قاعدين قدامنا و غريبة انهم كانوا مش بيحاولوا يداروا عصبيتهم و كانوا مع كل هجمة لانبي كانوا بيشجعوا و يعلوا صوتهم و يسخروا من اداء الزمالك طيب يعني افرضوا حد زملكاوي متعصب استفز ايه النتيجة بقا لو كلوا مسك في بعضه
5. عاوزة اقول ان برده الاهلوية اللي كانوا قدامنا دول كان فيه منهم بيرمي ورق و حاجات من الارض على الناس اللي قاعدة قدامهم مش عارفة ليه و يضحكوا و يعملوا نفسهم مش هم اللي عملوا كده رغم ان كان فيه سيدات قاعدة قدام و جه عليهم حاجات من اللي بتترمي
6. لقيت واحد زملكاوي في اخر الماتش اما اداء الزمالك بقا مش حلو رمى حاجة على الملعب بس الصراحة باقي الجمهور منعه وواحد قاله افرض جت على اللاعبين و اتعوروا فده اداني امل ان لسه فيه ناس عندها اخلاق
7. كم الشتايم اللي سمعته كان فوق الوصف بجد بس برده الحق يقال ان كان فيه ناس بتسكت اللي بيشتم و تنبهه لوجود سيدات في المكان بس ايه ولا الهوا لو  واحد بطل يشتم خمستلاف واحد هيشتم خاصة مع وشوك الماتش على انه ينتهي

خلاصة الكلام انا بجد انبسطت من التجربة دي و فرحت بالتشجيع و شكل الاستاد و الجمهور واننا لسه قادرين نفرح و ننسى مشاكلنا و اختلافاتنا و نجتمع لهدف واحد بس ياسلام بقا لو الهدف ده مش بس كورة ياسلام لو الهدف ده اننا نبني بلدنا و نطورها
بس الصراحة انا مش هكرر التجربة دي تاني خاااااااااااالص هروح الاستاد اه بس مش في نهائي تاني

ملحوظة حلوة على جنب  البوست ده مش عشان تقييم الماتش او للدخول في صراع على انتماءات كروية او اي حاجة من كده انا بس بنقل ملحوظاتي عن اليوم :))