فاصل و نعود...

فاصل محتاجاه جدا فعلا
افصل من الشغل ..من الروتين..من الملل
والاهم افصل من افكاري ...من وجعي ...من تعبي
مرت فترة طويلة من اخر مرة فصلت فيها
فترة حصل فيها حاجات كتير
فقدت حاجات كتير..وناس كتير برده
فترة على قد ما كان فيها من اوقات حلوة بس برده الوحش فيها كان كتير اوي
فترة عاوزة اسيبها ورايا و انا ماشية و ارجع ملقيهاش تاني
مع ان اوقات كتير بفكر ان المشكلة فيا انا اني مش عارفة انسى او افصل علشان للاسف دماغي هي الحاجة الوحيدة اللي مهما رحت او جيت بتيجي معايا و بالتالي هفصل منها ازاي
انما برده عندي امل كبير اوي ان دماغي كمان تفصل ..تنسى..تهدى
هبعد فترة ..هغير المكان..هغير الروتين اليومي...مش هغير الناس لاني مش هبقى لوحدي
"هرتب افكاري و اعيد حساباتي" جملة بقولها كتير اوي و اوقات كتير مش بعرف انفذها بس عندي امل كبير اني اعرف المرة دي
هقف قدام حبيبي .. البحر
ايوة ما هو حبيبي لانه وحشني جدا و يمكن بعده من الحاجات اللي تعبتني اوي
هبصله و هيفهمني من غير ما اتكلم
دموعي هتنزل قدامه و هيسيبها تنزل و مش هيقولي كفاية عشان عارف ان فيها راحتي
هرمي نفسي في حضنه و اغرق فيه وعارفة انه هيحن عليا اوي
ومع نفسي اللي هرميها فيه هرمي كل حاجة عاوزة ارميها و عارفة انه هياخدها و يخبيها بعيد اوي جواه و مش هتطلع تاني
اصل جواه ده كبير اوي وواسع هيسع لكل الاسرار و الحكايات و الدموع و الاهات والوجع والتعب
دي دمعة برميها
ودي ذكرى ببعدها
وده الم بنساه
ودي حكاية و خلصت
وده باب و اتقفل
وده سر واتحفظ
ودي انا ...انا بس من غير كل ده
من غير الذكرى
من غير الحكاية
من غير الدمعة
من غير السر
من غير الالم
انا وبس
انا اللي نسيتها
انا اللي افتقدتها
انا اللي بنفض من عليها التراب عشان اشوفها بوضوح من تاني
انا اللي بلملمها و بطبطب عليها و بحاول انسيها اللي شافته علشان ترجع تاني
لما قلت فاصل و نعود فعلا كان قصدي نعود بصيغة الجمع عشان انا محتاجة ان انا و نفسي نعود
عندي امل اني مرجعش لوحدي و انها ترجع معايا
يارب ترجع معايا
هتوحشوني اوي اوي بجد و بحبكو اوي اوي لانكو فعلا بجد نعمة من ربنا بوجودكو في حياتي و مدونتي اللي ربنا انعم بيها عليا علشان اعرف ناس حلوين زيكو مكنتش هعرفهم من غير ما ادخل عالم الكتابة
محتاجة دعاكم ليا اوي
اوعو تنسوني ده هم كام يوم و راجعة على طول وقد اعذر من انذر :):):)
احبكم في الله