اوقات كتير و انا مع نفسي بفتكر ايام زمان و انا صغيرة افتكر احلامي و استعجالي لبكرة انه ييجي عشان احقق كل اللي نفسي فيه
و كأن الغد هو بابا نويل اللي هييجي محمل بالهدايا و الفرحة و معاه العصايا السحرية اللي اول ما تلمس الحجر هيتحول الى الماس
بييجي على بالي ساعات و انا في رمضان و بنات الجيران ينادوني عشان انزل اقف معاهم في الشارع و نغني حللو يا حللو بالفانوس او نلعب مع بعض فتحي يا وردة قفلي ياوردة
بفتكر لمتنا على الفطار في رمضان و كلنا مستنيين سلاحف النينجا او بوجي و طمطم بكل شوق و اول ما نشوفها نتابعها و نفرح اوي
افتكر ايام المدرسة وانا في ابتدائي و احنا بنجري ورا بعض و نلعب كهربا و استغماية
صوت ضحكاتنا لسه ف وداني كان ممكن انط لفوق و احس اني هلمس السما بايديا
و انا مستنية اوتوبيس المدرسة و بنط الحبل و بلعب الاولى و نتنافس مين هيقدر يلعب من غير ما يقع
تيجي على بالي ايام قعادنا عند تيته الله يرحمها و دلعهم ليا و قعدتي على حجر خالو و لعبي مع جدو الله يرحمه افتكر و انا ماشية بتسحب اجيب سيجارة لخالو من علبة سجاير جدو و جدو شايفني و عامل نفسه مش واخد باله و يقعد يضحك عليا
افتكر ايام الثانوي و لعبنا الغمزة مع بعض و قعادنا في اخر الفصل و نعمل نفسنا نايمين و كل واحدة فينا بتقرا قصة او بتسمع اغنية
افتكر شقاوتنا في الفصل و الغنا و الرقص اللي كنا بنعمله و الفصل فاضي مفيهوش مدرسين
افتكر احلامي انا و صحابي عن المستقبل الوردي و الفارس اللي هيجي يخطفني على الحصان الابيض و اعيش معاه في تبات و نبات و نخلف صبيان و بنات
كنت بقعد اتخيله وارسمه في احلامي و ابحث عنه في كل اللي بيقابلني
افتكر ايام الكلية و قعدتنا انا و صحابي على السلم بنحكي و نضحك و نلعب و كل واحدة فينا بتقول اسرارها و احلامها
افتكر الكافيتيريا اللي كنا بنجيب منها سندوتشات رخيصة اوي و الله اعلم معمولة ازاي بس كانت في نظرنا لذيذة جدا
كنا بنستعجل و نقول امتى نتخرج بقى و نكبر و نحقق كل اللي نفسنا فيه
بفتكر كل ده دلوقتي و اشوف قد ايه اتغيرنا و الدنيا اخدتنا لفين
بكرة اللي كنا بنستناه و نحلم بيه وبالهدايا اللي محمل بيها مختلف تماما عن الواقع اللي عايشينه
نزلنا على ارض الواقع و عرفنا ان الحياة مش مجرد احلام فقط
البراءة اللي كانت في عينينا و في احلامنا كان لازم تنزل لارض الواقع
بفتكر كل ده و ببتسم و بسكت و بواصل رحلتي في الحياة ما بين الاحلام و الواقع ....
هناك تعليقان (2):
كويس انك بتفتكرى كل دا يا فوكيرة
وبتبتسمى ...
:)
عادة الناس بتحزن
وتتمنى رجوع الماضى
او التحسر ع الحاضر
وبس
الواقع فيه حاجات كتير صعبة
متعبة
إتفاجئنا بيها صحيح
بس هييجى يوم علينا
ف المستقبل ان شاء الله
ونكتشف انها سهلة
مقارنة بواقعنا انذاك
كل وقت وله ادان
زى ما بيقولوا
وكل وقت وله فرحه وحزنه
المهم
رد فعلنا تجاه اللحظة ايه
انتى إبتسمتى
يبقى خير يا حبيبتى
كونى بخير دايما
:)
فاتيما
انا افتكرت و ابتسمت لاني بحمد ربنا ان حتى لو الواقع صعب فالحمد لله ان ربنا منحنا رصيد كويس نفتكره و يهون علينا و يدينا امل ف بكرة وزي ما قلتي فعلا كل وقت و له فرحه وحزنه المهم رد فعلنا تجاه اللحظة ايه
نورتي المدونة :))
إرسال تعليق