ممكن لو قعدت اكتب من هنا لحد ميت سنة قدام مش هقدر اوفيكي حقك عليا يا امي
هقول ايه
بحبك ... مش هتوصف حبي ليكي و خوفي عليكي
ربنا يخليكي ليا ...مش هتعبر عن كم الدعاء اللي عاوزة ادعيهولك يا ماما
ممكن تكون المدونة دي بتديلي مساحة اني اقولك كلام من قلبي لقلبك على طول ممكن لو كنت قاعدة معاكي مش هعرف اقوله ليكي عشان انا زي ما انتي عارفة مش بعرف اتكلم كتير او اعبر عن اللي جوايا
عاوزة اقولك اني لو لفيت الدنيا مش هلاقي حضنك اللي بجري عليه و ارمي نفسي فيه لو متضايقة او في حاجة خنقاني و بتبقى عارفة اللي فيا من نظرة عيني زي ما بتقولي
ببقى عارفة حبك و حنانك اللي جواكي و اللي بيترجم لعصبية في بعض الاحيان من كتر الخوف علينا و طبعا عشان احنا مخنا صغير مبنفهمش ده ف وقتها
دايما بتدي الاولوية لراحتنا و سعادتنا حتى لو كان ده على حسابك انتي و على حساب صحتك
متعرفيش انا بحتاج دعاكي ليا قد ايه يا ماما اللي بيدينى امل كبير لان اكيد ربنا سبحانه و تعالى هيسمع دعاكي و يستجيب ليه
يمكن في حاجات كتير اوي انا و انتي اللي نعرفها بس و تحديات كتير اوي قابلتنا في الفترة اللي فاتت بالذات و انتي متحملاها بقوة و شجاعة و بنتحتي في الصخر زي ما بيقولو عشان نعدي منها على خير
خليكي قوية يا ماما لو سمحتى عشان من قوتك كلنا عايشين و قادرين نكمل
بحبك يا ماما و ربنا يخليكي لينا و يقويكي
بجد بحبك
هناك 3 تعليقات:
أنا بدأت أتابع المدونات من فترة صغيرة
و أول مرة أدخل مدونتك بس بجد كتابتك جميلة جدا
تخيلى من جمال إللى قريته عندك و عند ناس ثانية خليتونى أعمل مدونة انا كمان، مع إنى كنت بطلت كتابة من زمان أوى
شكرا ليكى و للمدونين كلهم إللى بيساعدوا فى تغيير أفكار الناس
جربى تشوفى مدونتى اللى لسة جديدة بشوكها
www.lesstalkingwoman.blogspot.com
البوست دة جميل بشكل خلانى أدمع
أنا بدأت أتابع المدونات من فترة ضغيرة و من جمال اللى قريته عندك و عند غيرك رجعت أكتب أنا كمان مع إنى بطلت من فترة طويلة
شكرا لك و لكل المدونين إللى بيساعدوا فى تحريك أفكار الناس و مشاعرهم
زورى مدونتى إللى لسة جديدة بشوكها
www.lesstalkingwoman.blogspot.com
شهرزاد المصرية
مبسوطة جدا ان المدونة عجبتك وياريت متكونش اخر زيارة ليكي هنا :)
و يشرفني اني اجي مدونتك
شكرا ليكي
إرسال تعليق