صحيت النهاردة من النوم و انا مهدودة من كتر التفكير و كأني كنت في معركة
نزلت من البيت في طريقي لشغلي زي كل يوم
ركبت الاتوبيس و فكري مشغول باحداث كتير اوي
لقيت السواق شغل نجاة اغنية "الا انت"
لقيتني بسرح مع صوتها الدافي
حسيت اني دست على زرار PAUSE
الزرار اللي بندوس عليه و نوقف اللي شغال سواء في الكاسيت او الفيديو
لقيتني بروح مع الاغنية و الكلام و الصوت الدافي اللي بيغني
لقيتني بفتح الشباك و نسمة هوا حلوة بتداعب وشي
لقيتني برفع عيني للسما الزرقا و قطع السحب البيضا اللي مزيناها
لقيتني بتفرج على شكل الشجر الاخضر الجميل
الصوت الدافي بيغني
و انا لسه دايسه زرار PAUSE
حسيت بلحظة استمتاع بالحياة من حواليا
حسيت بلحظة حلوة شحنت فيها طاقتي
افتكرت الاعلان اللي بيقول "وقف لحظة و عيش الفرحة"
انا وقفت لحظة و عشت الفرحة
ليست هناك تعليقات:
إرسال تعليق