انا عندي كرش كبير

قاللها : يا حبيبتي انا قلقان بقالي كتير
          وعندي سر خطير
قالتله: قول يا حبيبي ومايهمكشي
       واعرف ان سرك في بير
قاللها : انا عندي كرش كبير
         مخلليني مبنامش في الليل كتير
       وتاعبني و موحش شكلي
       مش زي شباب كتير
قالتله: احنا مع بعض ع الحلوة و المرة
        ومتحملش هم بالمرة
        كرشك ده هشيله في عينيه من جوه
قاللها: ربنا يخلليكي ليا
      ويخللي ايامنا الجاية
          كلها دفا و حنية
قالتله: يا حبيبي يا نني عينيا
       انا عمري كله من اللحظة ديا
      فداك يا سعادتي و هنا لياليا
واتجوزوا الاتنين وعاشولهم في سعادة يومين
ومرت الايام و السنين والكرش بقى كرشين
في يوم وهي معدية في الصالة ساعة الصبحية
ورابطة راسها  ورايحة تروق النملية
لاقيته قاعد في الضلمة وماسك التليفون
وقاعد بيهمس  بصوت واطى وحنون
بيقول بحبك ومش قادر على بعدك
وحياتي من غيرك جحيم في جحيم
فتحت النور بسرعة
وقالتله بتقول ايه يابو دماغ قرعة
حياتك ايه اللي جحيم في جحيم
مش كفاية اني مستحملاك و مستحملة كرشك سنين
انا سايبالك البيت ورايحة بيت نينة
قال رضينا بالكرش والكرش مش راضي بينا