هو انا نايمة بقالي قد ايه؟
انا حاسة اني بتهز ... هو فيه زلزال ولا ايه؟
انا متأكده ان اللي كتب اغنية الدنيا زي المرجيحة كان عنده الاذن الوسطى
اه ما هو بيقول يوم تحت و فوق
انا حاسة ان دقيقة تحت و دقيقة فوق
اه يا دماغي
انا عاوزة اقوم بقى النت وحشني والفيس بوك وحشني و مدونتي وحشتني
ياه ده الشغل كمان وحشني ...انا حاسة ان موضوع الاذن الوسطى ده اثر على دماغي ...من امتى الشغل بيوحشني؟
هو انا بقالي اد ايه مش قادرة اتحرك ؟
ياه مش قادرة انسى شكل امي اما ودوني البيت و هم سانديني كانت مخضوضة اوي
الله يكون في عون الست دي بجد
اه يا دماغي
هو انا ليه حاسة اني عاوزة اعيط؟
بيقولو ان الموضوع ده ممكن يكون ليه علاقة بالحالة النفسية و انا فاكرة اخر مرتين جالى فيها الدوار ده كانت حالتي النفسية زفت
طيب هو انا دلوقتي حالتي النفسية زفت؟ انا مش بقيت اسأل نفسي السؤال ده خلاص
صحابي بيسـالو عليا ربنا يخليهم ليا وحشوني اوي العيال دول
بكره ارجعلهم و اوجع دماغهم
يووووه دول جابو باص جديد بسواق جديد في الشغل لازم اكلمه و اوصفله مكاني عشان اما انزل الشغل
بس انا حتى لا اعرف اسمه ولا شكل الاتوبيس الجديد ولا حتى رقمه
اي اتوبيس هيقف قدامي هركب فيه كده؟ ده انا هبقى لقطة لو حد فكر يخطفني
اه يا دماغي انا فعلا حاسة اني بتهز
عاوزة اما ارجع الشغل احاسب البوفيه عليا فلوس كتير و عاوزة ادفع فلوس المستشفى و الدوا لصحابي مش بحب يبقى عليا فلوس لحد
انا عاوزة اكل بس مش ليا نفس ...احسن عشان اخس ...بس انا كان نفسي اخس بشكل طبيعي مش بسبب المرض
هو انا بفكر كتير كده ليه ...ده انا حتى اكتر عضو تعبان فيا هو دماغي المفروض يستريح شوية
انا حاسة اني بفكر بسرعة 500 فكرة في الدقيقة
ياااه انا دلوقتي بس فهمت اما في الافلام الكارتون بيجيبوالعصافير بتدور حوالين دماغ توم ولا جيري و تفضل تصوصو اهي العصافير بتدور دلوقتي حوالين دماغي محدش يعمل فيا ثواب و يهشها بقا
تلك كانت جزء بسيط من تخاريفي اثناء مرضي في الايام الماضية بسبب الاذن الوسطى و حتى الان تأبي العصافير ان تتوقف عن الدوران
ليست هناك تعليقات:
إرسال تعليق