اخد الشر وراح

اوقات كتير كنت بسمع جملة (اخد الشر وراح) على حاجة اتكسرت او وقعت في الارض
ما كانش بييجي في بالي ساعتها ادقق اوي في المعنى
بس لقيتني بفكر و اقول اخد الشر وراح على حاجات كتير

لو فقدت حبيب
 يبقى اخد الشر وراح
يمكن لو كان فضل معاك كنت ممكن تعاني منه بقية حياتك

لو خانك صديق
يبقى اخد الشر وراح
يمكن لو كان فضل معاك كان هيبقى صديق سوء ياخدك لطريق غير محمود العواقب

لو خسرت وظيفة
يبقى اخدت الشر وراحت
يمكن لو كنت لسه فيها كان يبقى فيها ضرر ليك

لو ضاع منك حلم
يبقى اخد الشر وراح
يمكن لو اتحقق الحلم ده كان بقى كابوس في حياتك

كل حاجة ضاعت او ما اتحققتش اخدت الشر وراحت و اكيد ماكانش فيها خير وربنا سبحانه و تعالى هيعوض بحاجة احسن منها

الى كل اللي فقدتهم او راحوا من حياتي  والى كل حلم ما اتحققش احب اقوللكوا انكوا
(اخدتوا الشر و رحتوا)