عن كلام كتير عاوزة اقوله و مش عارفة ..طيب ليه؟ هو انا مش لاقية حروف؟ ولا مش لاقية قدرة على الكلام؟
حاسة ان عقلي عامل زي الاوضة المكركبة عاوزة ادخل جواه كده و احط كل حاجة مكانها و الم الحاجات اللي ملهاش لازمة وارميها
ساعات بفكر ان لو ابتديت من الاول وعدت الشريط هتجنب اخطائي بس اكتشفت اني هتصرف بنفس الطريقة لاني هكون ساعتها لسه متعلمتش
في جوايا شوية سواد مكانش موجود قبل كده مش راضي يروح
حاسة اني رحت مشوار و مش عارفة ارجع منه وكأن في حد شال اليافطة اللي عليها الاتجاهات
محتاجة الاقيني تاني
انا بحبني
في كدة شوية دموع على بواقي وجع على حتة صرخة محتاجين يخرجوا و كله هيبقى تمام
وفيها ايه اما اليوم يكون عبارة عن نسمة حلوة وشوية شمس واغنية لمنير..وفيها ايه اما يبقى تمشية حلوة ساعة المغربية و لا قعدة ساعة العصاري مع كباية شاي بلبن و كيكة بالشوكولاتة ولا يكون مع ده كله ضحكة صافية طالعة من القلب و شوية لعب مع العيال.. وفيها ايه اما يبقى اليوم عبارة عن راحة بال محشية بالبساطة متغلفة بالنفس الهادية اللي مش مليانة افكار...عن الروقان الذي لا اجده اتحدث!!!
حاسة اني قاعدة في الويتنج ايريا مستنية دوري يجي في حياتي عشان العبه و كان كل اللي انا عايشاه ده دور واحدة تانية غيري
اوقات كتير بشك في نفسي واني فقدت القدرة على الكتابة او اني اصلا مش بعرف اكتب مش عارفة هل ده سببه زحمة الافكار اللي جوايا ولا انا فعلا مبعرفش اكتب !!!
انا زهقت
غصب عني مسيطرة عليا الحالة الكئيبة "وكأن احدهم اطفا نورا كان يضئ بداخلي"...منه لله اللي طفا النور
عن الحاجات البسيطة اللي كانت بتفرحني بس مبقاش ليها نفس الاثر مش عارفة ليه
ربنا كريم و عالم باللي جوايا اللي انا نفسي مش عارفاه
هناك 12 تعليقًا:
صباح الخير
مش عارفه يمكن في جمله
قولتيها تشبهني الايام دي
هي
في سواد جوايا مش عايز يروح
اعتقد ده ممكن يترجم ان احنا بقينا
مش عارفين نسامح او اتعلمنا نكره
مش عارفه العيب من مين الناس ولا احنا
احيانا بنتمرد علي روحنا ونعاتبها
ونقولها اتغيري علشان ماتتعبيش ونلاقي نفسنا بردوا تعبانين
بصي اعتقد ان ترتيب الافكار مابيجيش لما نكون تعبانين
اعتقد ان ترتيب الافكار بيجي لوحده لما نروق كده شويه
انتي بتعرفي تكتبي بلاش عدم التقه دي
تحياتي
دى باينها حالة عامة
غالبا الاشياء البسيطة بتفرحنا
لما يكون اللى جوانا بسيط
ربنا يبسط حياتنا
تحياتى
:( ماكانتش حمل اقرا بوست زى دا وبالحالة والاحساس دول
يمكن لانى خلاص فقدت القدرة على المقاومة عديت بكل اللى قولتيه كله فشوفت بصوتك صوت وصورة مافيش بايدى غير انى ادعيلك وادعيلى وادعى لكل حابيبنا ربنا يهون ويصلح الحال للكل اللهم لا تحملنا مالا طاقة لنا به ربنا معاكى يارب
هو فيروس فى الجو
عجبنى تعبير انا بحبنى اوى
على فكرة انا كمان بحبنى ونفسى افرحنى اوى
والله يا أستاذة ما عارف !!
ربنا يفرجها علينا جميعاً يا رب ويطبطب علينا ويفرح قلوبنا اللهم آمين
انتى بتكلمى عنى ببساطه اوى الحقيقه البوست دة كل مقطع فيه روايه
ومين دى اللى مبتعرفش تكتب انتى بتهرجى مش كده
بس على فكرة جالى نفس الشك ومازال تحسي اننا هنالف كتاب رحلتى من الشك في كتاباتى الى اليقين بها :)
دومتى بكل خير شيمووووووووو
احبك <3
كارولين فاروق
مش عارفة السواد ده بجد سببه ايه ولا هيروح ازاي بس الاكيد انه ملوش مكان و اتمنى يروح بقا
هو مش عدم ثقة ف اني مش بكتب على قد ما هو توهان او عدم تركيز و ضياع الافكار
نورتيني :)
ابراهيم رزق
يارب يبسط حياتنا و يفرح قلوبنا جميعا
نورتني :)
richardCatheart
معلش بقا مكانش قصدي :)))
ربنا يفرح قلبك و قلبنا جميعا و يهون كل وجع
نورتيني :)
reemaas
تصدقي ابتديت احس انه فيروس ف الجو فعلا طيب مفيش ليه بيرسول ولا حاجة :)))
انا كمان نفسي افرحني اوي
نورتيني :)
P A S H A
والله وانا كمان مش عارفة :)))
ربنا يفرح كل قلب مهموم و يفك كرب الجميع يارب
نورتني :)
rona ali
حبيبتي وحشتينييييي جدا جدا جدا
تصدقي حلوة رحلتي من الشك في كتاباتي الى اليقين بها دي يالا بينا نعمل كتاب :)))
نورتيني يا احلى رونا :)
إرسال تعليق